ម៉ាឡាវី៖ អាជ្ញាធរសុខាភិបាលប្រទេសម៉ាឡាវី នៅថ្ងៃពុធម្សិលមិញនេះ បានដុតបំផ្លាញចោលនូវវ៉ាក់សាំងកូវីដ-១៩ ប្រភេទអាស្រ្តា-ហ្សេណេកា ជាង ១៩,០០០ដូស ជាសាធារណៈ ដែលវ៉ាក់សាំងទាំងនោះបានផុតសុពលភាពកាលពីថ្ងៃទី១៣ ខែមេសា កន្លងទៅ។

នេះគឺជាការដុតបំផ្លាញចោលជាសាធារណៈនូវវ៉ាក់សាំងប្រឆាំងកូវីដ-១៩ជាលើកដំបូង ខណៈកន្លងមកអង្គការសុខភាពពិភពលោក បានណែនាំមិនឱ្យមានការបំផ្លាញចោលជាសាធារណៈបែបនេះឡើយ ប៉ុន្តែក្រោយមកស្ថាប័នមានតួនាទីសំខាន់ផ្នែកសុខភាពមួយនេះ បានផ្លាស់ប្តូរមកលើកទឹកចិត្តឱ្យមានការបង្ហាញជាសាធារណៈវិញ។

កន្លងមកមានការព្រួយបារម្ភពីបញ្ហាសុវត្ថិភាពវ៉ាក់សាំងពីសំណាក់ប្រជាពលរដ្ឋក្នុងប្រទេសនេះ ខណៈដែលសកម្មភាពបំផ្លាញចោលខាងលើ ត្រូវបានអាជ្ញាធរសុខាភិបាលប្រទេសនេះចាត់ទុកថា វាជាការបង្ហាញដល់ប្រជាជនទាំងអស់នូវការយកចិត្តទុកដាក់បន្ថែមលើពួកគេ ហើយធានាវ៉ាក់សាំងដែលរដ្ឋផ្តល់ឱ្យសុទ្ធតែជាវ៉ាក់សាំងដែលមានគុណភាព សំដៅប្រយុទ្ធប្រឆាំង និងការពារគ្រោះថ្នាក់ដែលអាចកើតមានដោយសារវីរុសកូវីដ។

គួរបញ្ជាក់ថា ប្រទេសម៉ាឡាវី បានទទួលនូវវ៉ាក់សាំងប្រភេទអាស្រ្តា-ហ្សេណេកានេះចំនួន ១០២,០០០ដូសពីសហភាពអាហ្វ្រិក និងត្រូវបានប្រើប្រាស់អស់ប្រមាណ ៨០ភាគរយ។ ម៉ាឡាវី មានករណីឆ្លងសរុបចំនួន ៣៤,២៣២ករណី និងមានអ្នកស្លាប់ ១,១៥៣នាក់ ក្នុងចំណោ
មប្រជាជនសរុបជាង ១៨លាននាក់៕